Xherdan Shaqiri ka thënë se Zvicra do të synojë ta mposhtë Kosovën për ta konfirmuar kualifikimin në “Euro 2024”. Në konferencën për shtyp, Shaqiri është paraqitur përkrah selektorit Murat Yakin.
Shaqiri pranoi se nuk ishte aspak i kënaqur që nuk u aktivizua ndaj Izraelit, ndeshje që u luajt në Hungari dhe përfundoi 1:1. Megjithatë, ai pritet të jetë titullar ndaj Kosovës në duelin që luhet të shtunën prej orës 20:45 në Basel dhe i takon Grupit I kualifikues.
Në këtë ndeshje, Shaqiri do ta regjistrojë paraqitjen e tij të 118-të me “helvetikët”.
“Nuk isha aspak i kënaqur që nuk luajta kundër Izraelit, por pas ndeshjes kemi biseduar me trajnerin dhe gjithçka është në rregull. Kjo është shumë e rëndësishme. Tash, me intereson ndeshja me Kosovën, të cilën duhet ta fitojmë. Jam i gatshëm ta ndihmoj ekipin, pasi të gjithë i dinë cilësitë e mia”, ka thënë Shaqiri.
