Meteorologët paralajmërojnë udhëtime jo aq të sigurta për pushime, të ftohta e kërcënuese për jetën për pjesën më të madhe të Shteteve të Bashkuara, teksa një masë ajrore arktike fryn në jug të Shteteve të Bashkuara.
“Ne po shikojmë se do të ketë temperatura shumë nën normale, temperatura potencialisht të ulëta rekord që çojnë në festën e Krishtlindjeve”, ka thënë Zack Taylor, meteorolog në Shërbimin Kombëtar të Motit.
Ajri polar po mbërrin gjersa një sistem i mëhershëm stuhish gradualisht zbehet në verilindje të SHBA-së, pasi ka futur pjesë të rajonit nën 61 centimetra borë. Më shumë se 80.000 klientë në New England ishin ende pa energji, sipas poweroutage.us, i cili gjurmon ndërprerjet në të gjithë vendin.
Pjesa e përparme arktike në hyrje sjell “kushte ngrirjeje ekstreme dhe të zgjatura për Misisipin jugor dhe Luizianën juglindore”, ka bërë të ditur Shërbimi Kombëtar i Motit në një deklaratë të veçantë të motit.
Temperaturat do të bien deri në minus 10.6 celsius në Jackson, Mississippi; dhe rreth minus 15 gradë celsius në Nashville, Tennesi, parashikon Shërbimi Kombëtar i Motit.
Për pjesën më të madhe të SHBA-së, moti i dimrit do të përkeqësohet para se të përmirësohet.
Javët e ardhshme kanë potencialin për “ajrin më të ftohtë të sezonit” pasi fronti i fortë arktik marshon në të gjithë dy të tretat lindore të vendit në ditët para Krishtlindjeve, sipas parashikimeve më të fundit nga Qendra Federale e Parashikimit të Motit në College Park, Maryland.
Qendra ka paralajmëruar për një “përhapje masive të temperaturave të ftohta nga rrafshnaltat e veriut të shkëmbinjve/rrafshnaltat veriore në Perëndimin e Mesëm deri në mes të javës, dhe më pas duke arritur në bregun e Gjirit dhe në pjesën më të madhe të SHBA-së Lindore”.
Në Atlanta, ku temperaturat kanë nisur të bien nën zero, sinoptikët paralajmërojnë për ajër edhe më të ftohtë nga fundi i javës, sipas zyrës së Shërbimit Kombëtar të Motit në Peachtree City, Georgia.
Temperaturat e ftohta mund të marrin edhe jetë– një realitet rrëqethës që avokati i të pastrehëve në Atlanta, George Chidi, e njeh goxha mirë.
Ai kishte shkuar për të kontrolluar një grua me probleme të rënda të shëndetit mendor në qendër të Atlantas në fillim të këtij viti dhe zbuloi se ajo kishte vdekur nga hipotermia e dyshuar vetëm disa orë më parë. Trupi i saj u gjet jashtë stacionit të autobusëve Greyhound, i cili është i hapur 24 orë në qendër të Atlantas, ka treguar ai.
Ai ka bërë të ditur se njerëzit pa strehim që vdesin në mot të acartë shpesh e bëjnë këtë, sepse po luftojnë me alkoolin, drogën ose sëmundje të rënda mendore, ose nuk u besojnë të tjerëve dhe e gjejnë veten në rrugë dhe jo në një strehë me njerëzit e tjerë.
Njerëzit e pastrehë në shtetet jugore janë gjithashtu të prekshëm ndaj modeleve të motit që e bëjnë atë të rehatshëm një javë, por papritur ngrijnë tjetrën.
“Një faktor kryesor nuk është vetëm temperatura”, ka theksuar Chidi. “Është shpejtësia me të cilën temperatura bie”.
Florida nuk do të ketë Krishtlindje “të bardha”, por sinoptikët presin që fundjava të jetë jashtëzakonisht e ftohtë në të gjithë shtetin.
Qytetet e Floridas veriore, si Jacksonville, Tallahassee dhe Pensacola, kanë parashikuar ulje minus 3 velsius në prag të Krishtlindjeve.
Në verilindje, kompanitë e shërbimeve sollën punëtorë shtesë nga shtete të tjera, por u penguan nga rrugët e akullta dhe kushtet e rrezikshme.
“Ishte borë e rëndë dhe e lagësht, kështu që kishte ndikime si në udhëtim ashtu edhe në infrastrukturë”, ka shpjeguar Frank Pereira, meteorolog në Shërbimin Kombëtar të Motit.
Policia në të gjithë New Englandin iu përgjigj qindra përplasjeve të fundjavës ose automjeteve që rrëshqisnin nga rruga. Policia e shtetit të Maines ka njoftuar se u ishte përgjigjur më shumë se 180 aksidenteve vetëm gjatë fundjavës. Ka pasur vetëm lëndime të lehta.
