Ajo që nisi si një iniciativë e thjeshtë qytetare, u shndërrua në një shembull frymëzues të bashkëpunimit dhe përkushtimit për komunitetin. Në fshatin Velekincë të Gjilanit, banorët, së bashku me asamblistin Fadil Ademi, zhvilluan një aksion vullnetar për ngjyrosjen e shtyllave mbrojtëse përgjatë trotuarit, duke i dhënë kësaj pjese një pamje më të bukur, më të rregullt dhe më të sigurt.
Përveç aspektit estetik, kjo nismë synon të rrisë sigurinë e këmbësorëve, pasi shtyllat tashmë janë më të dukshme edhe gjatë orëve të natës, duke lehtësuar lëvizjen dhe duke kontribuar në një komunikacion më të sigurt.
Asamblisti Fadil Ademi falënderoi të gjithë banorët që iu bashkuan aksionit me punë e përkushtim, si dhe shprehu mirënjohje të veçantë për kompaninë Biti Bau, e cila siguroi materialet dhe pajisjet e nevojshme për realizimin e kësaj nisme.
Ky aksion dëshmon se kur qytetarët bashkojnë forcat për të mirën e përbashkët, edhe një veprim i vogël mund të sjellë ndryshime të mëdha dhe të krijojë një shembull pozitiv për të gjithë komunitetin.
