Rritja e fluksit të bashkatdhetarëve që kanë mësyrë Kosovën për pushime, ka rritur edhe pritjet në vendkalimet kufitare të shtetit tonë me vendet fqinje, raporton Gazeta Enigma.
Kolona të automjeteve të bashkatdhetarëve, që po vijnë nga shtetet e Evropës Perëndimore, janë krijuar në vendkalimet kufitare të Kosovës me Serbinë.
Sipas përditësimit të fundit të Qendrës Kombëtare për Menaxhimin Kufitar, të orës 19:37, pritjet më të gjata janë regjistruar në vendkalimin kufitar te Dheu I Bradhë, ku për te hyrë në Kosovë, pritet deri në 80 minuta, kurse kolona e automjeteve është deri në 350 metra.
Kolonë automjetesh deri në 200 metra është krijuar edhe në anën serbe të kufirit në vendkalimi kufitar në Merdar, ku po pritet deri në 60 minuta për të hyrë në Kosovë.
Ndërsa, Muçibabë dhe Jarninje po pritet prej 30 deri në 20 minuta, për të kaluar kufirin nga Serbia në Kosovë.
Pritje prej 10 deri në 15 minuta janë regjistruar dhe në dy vendkalimet me Maqedoninë e Veriut dhe Shqipërinë, në Hanin e Elezit dhe Vërmicë.
Edhe sot një numër i madh i mërgimtarëve ka arritur për pushime në Kosovë përmes linjës ajrore, prandaj edhe është shtuar fluksi i aterrimeve në Aeroportin e Prishtinës./Gazeta Enigma/
