Ministri i Brendshëm i Turqisë, Ali Yerlikaya, ka deklaruar se një sulm terrorist ka ndodhur në ambientet e kompanisë turke të hapësirës ajrore dhe mbrojtjes TUSASH, në periferi të Ankarasë. Sulmi ka shkaktuar viktima dhe të plagosur, por nuk janë dhënë detaje të sakta mbi numrin e tyre, shkruan Enigma.
Sipas mediave lokale, sulmuesit arritën në hyrjen e kompleksit me taksi, gjatë ndërrimit të personelit të sigurisë. Njëri prej tyre shpërtheu një bombë, ndërsa të tjerët depërtuan në ambientet e brendshme. Raportohet se të shtënat po vazhdojnë dhe një pjesë e stafit mund të jetë marrë peng.
Helikopterë janë parë duke fluturuar mbi zonë, dhe forcat e sigurisë, ambulancat dhe zjarrfikësit kanë mbërritur në vendngjarje. Punonjësit e kompanisë janë dërguar në një zonë të sigurt, raportojnë burimet e mediave lokale.
Ende nuk dihet kush qëndron pas sulmit, por në të kaluarën në Turqi janë kryer sulme nga militantët kurdë, grupi i Shtetit Islamik dhe ekstremistë të majtë.
