Irani ka nisur të dielën një valë sulmesh të koordinuara me raketa balistike dhe dronë ndaj disa vendeve të Gjirit Persik, përfshirë Katarin, Emiratet e Bashkuara Arabe, Bahrejnin dhe Kuvajtin, disa orë pas sulmeve të reja ajrore amerikane në Iran.
Gazetarët e Euronews në Doha raportuan për dy valë sulmesh iraniane, gjatë të cilave u dëgjuan shpërthime të fuqishme mbi kryeqytetin e Katarit. Forcat e mbrojtjes ajrore të Katarit njoftuan se kishin interceptuar disa raketa balistike që synonin territorin e vendit.
Ministria e Mbrojtjes e Katarit bëri të ditur se “Forcat e Armatosura të Katarit vazhdojnë të interceptojnë një numër sulmesh me raketa balistike që synojnë shtetin e Katarit”.
Banorët në Doha u alarmuan nga sirenat e emergjencës, ndërsa Ministria e Brendshme u kërkoi qytetarëve të qëndrojnë brenda, larg dritareve, duke paralajmëruar se niveli i kërcënimit të sigurisë është i lartë.
Sulme të ngjashme u raportuan edhe në Emiratet e Bashkuara Arabe, ku sistemet e mbrojtjes ajrore u aktivizuan kundër raketave dhe dronëve iranianë. Autoritetet atje thanë se shpërthimet e dëgjuara ishin rezultat i ndërhyrjeve të mbrojtjes ajrore.
Edhe ushtria e Kuvajtit njoftoi se po përballej me “objektiva ajrorë armiqësorë”, duke u bërë thirrje banorëve të strehohen, shkruan Euronews, përcjell Sinjali.
Këto sulme vijnë pas një operacioni të ri ushtarak amerikan në jug të Iranit. Komanda Qendrore e SHBA-së (CENTCOM) deklaroi se kishte kryer sulme ndaj rreth 140 objektivave, me qëllim dobësimin e aftësisë së Iranit për të sulmuar anijet civile dhe tregtare që kalojnë përmes Ngushticës së Hormuzit.
Operacioni amerikan erdhi si përgjigje ndaj një sulmi iranian ndaj një anijeje me flamur të Qipros në Ngushticën e Hormuzit, e cila u përfshi nga zjarri dhe detyroi ekuipazhin të braktiste anijen. Një marinar raportohet i zhdukur.
Sekretari amerikan i Mbrojtjes, Pete Hegseth, deklaroi se “Irani bëri një zgjedhje të keqe. Tani do ta paguajë çmimin”.
Ndërkohë, negociatori kryesor i Iranit dhe kryetari i parlamentit iranian, Mohammad Bagher Ghalibaf, paralajmëroi përmes një reagimi në platformën X se “epoka e marrëveshjeve të njëanshme ka përfunduar”, duke shtuar se “realiteti po troket”.
Situata në rajon mbetet e tensionuar, ndërsa disa vende të Gjirit kanë rritur masat e sigurisë pas përshkallëzimit të përplasjes mes SHBA-së dhe Iranit.
