Futbollisti kosovar Taulant Xhaka u ka uruar fitore sonte djemve të Kombëtares së Shqipërisë në ndeshjen e tyre me Serbinë në Leskoc, duke filluar nga ora 20:45.
Në Klan Kosova, Xhaka tha se ka emocione për futbollistët shqiptarë, pasi edhe vetë kishte luajtur ndaj Serbisë me Kombëtaren e Shqipërisë në vitin 2014.
“Edhe unë kam luajtur në vitin 2014 kundër Serbisë. Është gjë normale që kemi emocione, shpresojmë të ketë një fitore sonte”, tha Xhaka.
Ai u shpreh se kuqezinjtë duhet të kenë fokusin e tyre në futboll, dhe jo në politikë, që të mos shpërqendrohen për takimin e sotëm.
“Këshilla ime është që të luajnë me zemër dhe të japin maksimumin, ta kenë mendjen në futboll, të mos merren me politikë dhe ta mposhtin kundërshtarin e të marrin fitore”, ka thënë Xhaka.
I njëjti theksoi se tifozët në Serbi mund të jenë më agresivë, por këshilloi djemtë e Kombëtares Shqiptare që të jenë të qetë.
