Ka shumë raste kur gratë kosovare nuk ‘shpëtojnë’ nga problemet edhe pse zgjedhin që të shkurorëzohen e të ndajnë rrugët me bashkëshortët e tyre, të cilët u shkaktojnë telashe.
Edhe pas ndarjes, shumë nga ta nuk i lënë rehat ish-partneret e tyre.
Me një situatë të tillë është përballur një grua në Ferizaj, e cila ka denoncuar për dhunë bashkëshortin e saj me të cilin është në proces divorci.
Sinjali mëson se e gjithë ngjarja ka ndodhur pasi i dyshuari ka kërkuar paratë e fituara përmes biznesit të përbashkët, e më pas ka eskaluar në dhunë fizike ndaj 34-vjeçares.
Viktima ka marrë lëndime trupore dhe si pasojë ka kërkuar ndihmë në spital.
Ndërkohë i dyshuari është arrestuar dhe është shoqëruar në stacion policor për intervistim.
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor dhe i njëjti do të hetohet nën dyshimet për kryerjen e veprave penale ‘Dhunë në familje’ dhe ‘Lëndim i lehtë trupor’.
