Katër apartamente janë shkrumbuar krejtësisht në pallatin 10-katësh që u përfshi nga flakët të enjten, në rrugën ‘Sali Butka’, në zonën e njohur si ish-Parku i Autobusëve, në Tiranë.
Pallati 10-katësh ndërtuar në vitin 2021, rrezikoi seriozisht të shembej nga flakët që u shpërndanë thuajse në të gjithë strukturën e godinës së banuar, por fatmirësisht nuk shënuan të plagosur dhe asnjë humbje jete. Përhapja e flakëve në kohë rekord sikur të kishin hedhur benzinë, lidhet me materialin e ndërtimit.
Report TV mëson se veshja e pallatit që është shkëputur duke rënë copa-copa pasi u përfshi në flakë, ka favorizuar përhapjen e zjarrit. Dyshohet se ka qenë materiali ndërtimit i cilësisë së dobët që ka shërbyer si “benzinë” duke përhapur flakët nëpër ballkone e deri në brendësi të apartamenteve, duke sfiduar për tre orë punonjësit e zjarrfikëses. Materiali dyshohet se ka qenë i llojit “lesh guri” i cili sipas ekspertëve ka në përbërje plastikë.
Materiali dyshohet se ka qenë i llojit “lesh guri” i cili sipas ekspertëve ka në përbërje plastikë
Banorët e pallatit janë në pritje të ekspertëve të cilët do të kryejnë verifikimin e dëmeve nga zjarri si dhe shkaqet që çuan në shpërthimin e flakëve. Pas zjarrit në pallatin 10 katësh në zonën e ish-parkut të autobusëve në Tiranë, është shoqëruar në polici administratori i pallatit.
