Aktorja dhe deputetja Adriana Matoshi, është lajmëruar me një status në Facebook, pas daljes nga spitali, ku është operuar për tumorin në tru që i ishte rikthyer pas nëntë vitesh.
Matoshi ka shkruar se nuk e kishte besuar asnjëherë se sa shumë ndikojnë pozitivisht thirrjet dhe dedikimet që iu bënë me rastin e operimit.
“Gjithmonë e kom ditë që jemi popull i bashkum, popull që e zgjasim dorën kur duhet, po asniher nuk kisha besu sa shumë ndikojnë psiqikisht edhe shpirtnisht krejt ato thirrje, mesazhe, komente e dedikime pafund që i lexojsha gjithandej. Forca nuk u reflektu veç te unë, po te krejt njerzt me t’cilët jom e lidhun shpirtnisht. Ju i keni bo edhe ata me besu n’lutjet tuaja”, ka shkruar Matoshi.
Matoshi ka përmendur ecjen që u organizua në sheshet e Prishtinës, një ditë para operimit të saj.
Ajo thotë se marshe të tilla duhet të organizohen për fëmijët, gratë e burrat që luftojnë me sëmundjet të cilat mbi të gjitha kanë kosto të lartë financiare.
“Ecja/marshimi n’sheshin e Prishtinës u kon për mu e papritshme. Jo pse kom dyshu n’dashninë e njerzve t’mi, po n’temperatura qaq t’ulëta, i pashë të mbledhun shoqni, kolegë e qytetarë të cilët ma dhan forcën ma t’madhe ndërkohë që unë isha duke i’u nënshtru krejt analizave e kontrollave para operimit. Marshet e tilla duhet me u organizu e me ju dediku krejt atyne fmive, grave e burrave që luftojnë e na nuk e dijmë nëpër çka po kalojnë. Besomni nuk ja u njihni as dhimtën, as stresin, e as ngarkesën e kostos që e ka mjekimi për kto smundje kaq t’rona”, ka shkruar Matoshi.
Ajo ka falënderuar të gjithë ata që i kanë shkruar, derisa ka bërë të ditur se me rekomandim të mjekut, është duke qëndruar largë telefonit.
“Kurrë ma e përmbushun shpirtnisht nuk jom kon. Po ju falenderoj shumë krejt juve që m’keni shkrujt prej momentit që e kom publiku lajmin. Ma boni hallall që nuk kom mrri as me i lexu ato mija mesazhe që hala nuk po ndalen. Për momentin jom tu qëndru larg telefonit si rekomandim i mjekut për pushim dhe qetësi apsolute. Premtimin që ja u dhash, e majta. UNË, U KTHEVA ❤️”, ka shkruar Matoshi. / Gazeta Enigma.
