Një lojtar i ekipit kombëtar të futbollit të Panamasë është qëlluar për vdekje në qytetin e Colon, shkruan BBCNews, transmeton Gazeta Enigma.
Persona të armatosur hapën zjarr ndaj një grupi njerëzish, mes tyre 26-vjeçari Gilberto Hernández, të cilët ishin mbledhur në një ndërtesë në qytet.
Hernández vdiq dhe shtatë të tjerë u plagosën në sulm.
Nuk dihet ende nëse futbollisti, i cili ka luajtur edhe për Club Atlético Independiente, ka qenë objektivi i të shtënave apo cili ka qenë motivi.
Bëhet e ditur se ka pasur një rritje të vrasjeve në Colon gjatë muajve të fundit, ndërsa dy banda rivale luftojnë për kontrollin e rrugëve fitimprurëse të kontrabandës së drogës.
Deri më tani, më shumë se 50 njerëz janë vrarë në Colón, një qytet me 40,000 banorë.
Qyteti port, në hyrjen veriore të kanalit të Panamasë, është një pikë tranziti për kokainën e kontrabanduar nga Amerika e Jugut përmes Panamasë në Evropë.
Të shtënat kanë ndodhur të dielën pasdite me orën lokale.
Dy persona të armatosur detyruan një shofer taksie t’i çonte në një ndërtesë në lagjen Barrio Norte të qytetit dhe hapën zjarr ndaj grupit të mbledhur atje.
Personat e armatosur u larguan nga vendi i ngjarjes, por një i dyshuar është arrestuar në një banesë aty pranë.
Gilberto Hernández, kishte debutuar në kombëtaren panameze në mars të këtij viti në një ndeshje kundër Guatemalës.
Babai i lojtarit i kërkoi të rinjve të Colón “të ndalojnë dhunën” dhe u bëri thirrje autoriteteve të “fillojnë projekte për të shpëtuar të rinjtë nga kjo dhunë”.
Ai u kërkoi gjithashtu vrasësve të dorëzoheshin: “Mos bëni më shumë dëm”.
Federata e Futbollit të Panamasë dhe klubi i Gilberto Hernández shprehën ngushëllimet e tyre për familjen e tij. /Gazeta Enigma
