Shefja e Grupit Parlamentar të Lëvizjes Vetëvendosje, Arbërie Nagavci, ka bërë të ditur se partia e saj do t’i tërheqë kandidaturat për president nëse PDK dhe LDK propozojnë emra.
Ajo ka thënë se partia e Kurtit është në pritje të propozimeve nga partitë opozitare.
Sipas saj, nëse opozita sjell tre emra kredibilë, VV është e gatshme të tërheqë kandidatët e saj dhe këto emra të votohen në Kuvend. Ajo ka shtuar se një marrëveshje e tillë do të shmangte zgjedhjet e reja, të cilat sipas saj nuk do të sillnin zgjidhje të reja për vendin.
“Ne si Lëvizje Vetëvendosje, kemi propozuar nënkryetarin e Lëvizjes, zëvendëskryeministrin zotin Glauk Konjufca dhe zonjën Fatmire Mulhaxha-Kollçaku. Këto kanë qenë propozimet tona. Tani jemi edhe një hap tutje, kemi ofruar mundësinë që PDK dhe LDK, qoftë me dakordim të sjellin tre emra, qoftë cilado prej tyre të sjellë një propozim ose dy, dhe partia tjetër një propozim ose dy – pra mund të jenë edhe tre propozime ku një ose dy mund të vijnë nga PDK, një mund të vijë nga LDK. Ne jemi të gatshëm që në momentin që i kemi tre propozime nga PDK dhe LDK, të tërheqim emrat e kandidatëve tanë, zotit Glauk Konjufca dhe zonjës Fatmire Mulhaxha-Kollçaku dhe ato tre propozime të hidhen në votim në Kuvend. Dhe unë do t’u bëja thirrje partive PDK, LDK që të mendojnë dhe të propozojnë emra kredibilë, të cilët do t’i bënin nder vendit si president, me kusht që të mos jenë nga skena aktuale politike. Dhe situata është e qartë: nëse vijnë tre propozime për emra kredibilë, ne do t’i tërheqim edhe emrat tanë dhe vazhdojmë tutje, sepse jemi të bindur që edhe një palë zgjedhje të reja janë të padrejta, të panevojshme dhe nuk do të sillnin rezultate të reja”, ka thënë ajo.
