Në 48 orët para se të hapte zjarr ndaj ish-presidentit Donald Trump, 20-vjeçari Thomas Matthew Crooks bëri disa ndalesa rreth qytetit të tij periferik të Pittsburgh.
Të premten, ai shkoi në poligonin, pjesëtar i të cilit ishte dhe ushtroi të shtënat, tha një burim policor për CNN. Të nesërmen në mëngjes, Crooks shkoi në Home Depot, ku bleu një shkallë prej gjashtë këmbësh, dhe në një dyqan armësh, ku bleu 50 fishekë.
Crooks më pas udhëtoi me makinën e tij Hyundai Sonata rreth një orë në veri, duke u bashkuar me mijëra njerëz nga i gjithë rajoni që u dyndën në mitingun e Trump në Butler, Pensilvani.
Qëlloi me pushkën e të atit
Një pushkë e ngjashme me pushkën sulmuese AR-15 që ai përdori për të qëlluar Trump u ble ligjërisht nga babai i tij, Matthew Crooks. Kjo ishte një nga më shumë se 20 armët e zjarrit të regjistruara për të moshuarin Crooks, të cilat ndodheshin në shtëpinë e familjes, sipas të dhënave të Policisë së Shtetit të Pensilvanisë të shqyrtuara nga hetuesit. Të gjitha armët janë blerë ligjërisht.
Sulmuesi dhe babai i tij ishin anëtarë të Clairton Sportsmen’s Club, një klub armësh rreth 25 minuta me makinë nga shtëpia e tij. Ata qëlluan së bashku atje, konfirmoi policia. Rob Butey, avokati i klubit, konfirmoi në një deklaratë se Crooks më i ri ishte anëtar.
