Zëvendësuesi i Ardian Nuhiut te Shkëndija, zyrtarisht tashmë është Jeton Beqiri. Klubi tetovar dhe Beqiri kanë firmosur kontratë për një e vit gjysmë dhe e njejta është zyrtarizuar dhe konfirmuar nga faqja e Shkëndijës.
Jeton Beqiri rikthehet te Shkëndija për të udhëhequr skuadrën për herë të parë si shef i stafit teknik, pasi në të kaluarën ka qenë ndihmës trajner si dhe në dy raste ushtrues detyre.
“Të jesh trajner i Shkëndijës është privilegj dhe kënaqësi shumë e madhe, por në të njejtën kohë është edhe përgjegjësi dhe një sfidë e imja personale. Për këtë pjesë dua të falenderoj kryesinë e klubit dhe pronarët për besimin e dhënë, duke shpresuar që në fund edhe rezultatet të na japin të drejtë dhe të realizojmë objektivat”, deklaroi Jeton Beqiri pasi firmosi me kuqezinjtë.
Beqiri pranoi ftesën e Shkëndijës, duke ndërperë në mënyrë të njëanshme kontratën me skuadën Al Jabalain nga Arabia Saudite, ku për 15 muajt e kaluar kishte postin e menaxherit/drejtorit të Akademisë.
Në Arabi ai u transferua pasi udhëhoqi Bylisin drejt ngjitjes në elitën e futbollit shqiptar. Paraprakisht ishte trajner i parë te Struga dhe Renova, Gostivari e Drita, derisa si ndihmës trajner ka punuar edhe te Flamurtari i Vlorës./
