Blerim Krasniqi ka bërë njërën ndër paraqitjet më të mira që kur u transferua te Gjilani në Superligën e Kosovës në futboll.
Sulmuesi nga Shqipëria ka realizuar het-trik në ndeshjen kampionale ndaj Llapit në fitoren e ‘kuqebardhëve’ në “Zahir Pajaziti” me rezultat 2-4.
Siç merr vesh ekskluzivisht Gazeta “Enigma”, klubi i Llapit i ka dhuruar atij topin zyrtar të ndeshjes, ashtu siç bëjnë klubet më të mëdha evropiane.
Kjo është ndër herat e rralla që klubet nikoqire dhurojnë topat e ndeshjes për futbollistët që realizojnë het-trik brenda ndeshjes.
Kujtojmë që një javë më parë edhe Gerhard Progni i Gjilanit kishte realizuar het-trik në ndeshjen ndaj Ulpianës në “Sami Kelmendi” (0-4), por topin e ndeshjes nuk e kishte marrë.
Për atë ishte përkujdesur vetë klubi i Gjilanit, i cili kishte dhuruar topin Prognit me firmën e gjithë futbollistëve.
/Gazeta Enigma/
