Në Forumin Evropian Wachau, kancelari i Austrisë, Karl Nehammer, ka folur për vendimin e parlamentit bullgar për heqjen e vetos ndaj Maqedonisë së Veriut.
Në fjalën e tij ai tha se kjo ishte zgjidhje e mirë për demokracinë, ndërsa shtoi se BE duhet të shohë përparimin që ka arritur Shqipëria me Maqedoninë e Veriut.
“Na duhet të jemi të hapur, BE duhet të shohë se sa i madh është përparimi që keni arritur dhe njerëzit janë kaq të dëshpëruar se nuk është e ndershme që të përzihen gjërat me njëra-tjetrën. Tashmë që ka pasur një votë në parlamentin bullgar dhe më lini ta theksoj, kryeministri bullgar humbi votëbesimin në parlamentin e tij për shkak të kësaj dhe po lufton për ekzistencën politike si kreu i qeverisë”, është shprehur Nehammer.
“Kur vjen fjala për çështjen që duhet të ketë dakordësi mes Bullgarisë dhe Maqedonisë së Veriut për ta zhbllokuar këtë proces, e mori përsipër këtë rrezik dhe pavarësisht situatave të vështira, dje pati një zgjidhje të mirë për demokracinë. Këtu Europa është e fortë dhe e bashkuar, është e rëndësishme që rajoni të bashkëpunojë. Është detyrimi ynë që të sigurohemi që procesi të nisë njëherë e mirë”, shtoi ai.
