Ballkani dhe Shkupi do ta zhvillojnë sot ndeshjen më të rëndësishme në historinë e të dyja klubeve.
Dy skuadrat shqiptare ndeshen sot në kuadër të ndeshjes së kthimit në fazën “play-off” të Ligës së Konferencës.
Ballkani që është kampion i Kosovës, e fitoi ndeshjen e parë në kryeqytetin e Maqedonisë së Veriut ndaj Shkupit me rezultat 1:2.
Andaj, suharekasit duan ta mbrojnë rezultatin, teksa Shkupi kërkon përmbysjen.
Kryetari i Suharekës, Bali Muharremaj, që njihet për mbështetjen e tij të madhe ndaj Ballkanit, ka dalur në punë sot me fanellën e klubit suharekas.
Në rrjetin social “Facebook”, ai ka shkruar:
“Mirëmëngjes. Sot, ambienti i punës ka kuptim me fanelen e klubit tonë FC Ballkani”.
Në rast të fitores apo barazimit, Ballkani do ta shkruante historinë e futbollit të Kosovës duke u kualifikuar në grupet e Ligës së Konferencës.
Ndeshja e sotme nis nga ora 20:00 dhe luhet në stadiumin “Fadil Vokrri”.
Kjo përballje do të transmetohet direkt në Kanal10.
