Kombëtarja e Kosovës në futboll do të ndryshojë dy nga katër rivalët për ndeshjet miqësore të qershorit.
Federata e Futbollit e Kosovës ka njoftuar se për shkak që Qeveria e Kazakistanit nuk e ka lejuar Kombëtaren e këtij vendi të udhëtojë në Kosovë, ndeshja miqësore e paraparë për t’u zhvilluar më 4 qershor në Prishtinë, Kosovë – Kazakistan është anuluar. Në atë datë, “Dardanët” do të luajnë miqësore me Maltën në Austri.
Ndërkohë, miqësorja tjetër e paraparë për t’u zhvilluar në Antalia më 8 qershor kundër Komorosit, do të zëvendësohet me Guinenë, pasi Komorosi për shkak të restrikcioneve për hyrje në Turqi, si pasojë e Covid-19, e ka të pamundur të udhëtojë në këtë datë në Antalia.
“Dardanët” gjatë muajit qershor do t’i zhvillojnë katër ndeshje miqësore. Fillimisht më 1 qershor do të përballen me San Marinon në “Fadil Vokrri”, e më pas do të udhëtojnë në Austri për t’u përballur me Maltën (më 4 qershor), derisa më pas do të udhëtojnë në Antalia, ku do të zhvillojnë miqësoret me Guinenë dhe Gambinë, më 8 përkatësisht 11 qershor.
