Kryetari i Nismës, Fatmir Limaj, ka vizituar krerët e Ushtrisë Çlirimtare të Kosovës, që po mbahen në paraburgim në Hagë: Jakup Krasniqin, Hashim Thaçin, Kadri Veselin, Rexhep Selimin, Nasim Haradinajn, Hysni Gucatin e Pjetër Shalën.
Limaj, përmes një postimi në Facebook, shkroi se ishte emocion i veçantë t’i vizitonte krerët shtetërorë në prag të këtij përvjetori të pavarësisë së vendit.
“Emocion i veçantë që në vigjilje të 15-vjetorit të pavarësisë, t’i vizitoj dhe t’i uroj për këtë përvjetor themeluesit e UÇK-së, shpallësit e pavarësisë dhe shtetndërtimit. Miqtë dhe bashkëluftëtarët e mi, Jakup Krasniqin, Hashim Thaçin, Kadri Veselin Rexhep Selimin, Nasim Haradinajn, Hysni Gucatin e Pjetër Shalën”, ka shkruar Limaj në Facebook.
Ai tha se kjo është sprova e radhës e tyre, dhe “siç janë të bindur ata në triumfin e drejtësisë, ashtu jemi të bindur edhe ne se do të dalin fitimtarë e faqebardhë nga ky proces gjyqësor”.
