Drejtoria e Bujqësisë në Gjilan ka organizuar festën tradicionale të falënderimeve “Darka e Lamës”, ku morën pjesë fermerë, prodhues e përfaqësues të institucioneve lokale e qendrore.
Kryetari i Komunës, Alban Hyseni, ka thënë se ky është një takim kulmues i vitit sa i përket rendimentit që e marrim nga toka.
Ai shtoi se me 1.5 milion për vitin 2023, komuna ka arritur ta ketë një buxhet vetëm në sektorin e bujqësisë, si asnjëherë më parë në 23 vjetët e fundit.
“Komuna e Gjilanit për këtë vit është munduar që t’i kushtojë rëndësi të veçantë sektorit të bujqësisë. Nga një buxhet i trashëguar rreth 400 mijë euro, si planifikim që e kemi gjetur për vitin 2022, në vitin 2023 e kemi buxhetin prej 800 mijë euro vetëm nga Komuna e Gjilanit, ndërkaq në bashkëfinancim me organizatat e ndryshme kemi edhe rreth 700 mijë euro projekte. Tryeza e sotme e gjitha është prodhim nga duart e fermerëve, nga toka jonë”, ka thënë kryetari Hyseni, njoftojnë nga Komuna e Gjilanit.
