Të shtunën në mbremje, në afërsi të një kishe në Zveçan, një person ka qenë cak i një sulmi fizik nga një grup prej disa personave. Viktima ka pësuar lëndime trupore, ndërsa për rastin tashmë kanë nisur hetimet:
Sinjalizuesi nga Veriu ka bërë me dije për Sinjalin se bëhet fjalë për një 53-vjeçar, i cili u rrah nga tre persona, për motive akoma të panjohura.
Incidenti ka ndodhur në afërsi të kishës, ku edhe jeton viktima – i cili kërkoi ndihmën e Policisë pasi u sulmua nga të dyshuarit.
Si rezultat i denoncimit, në vendin e ngjarjes kanë intervenuar njësitë përkatëse policore, teksa 53-vjeçari ka dhënë deklaratën e tij për atë që ka ndodhur.
Sipas dëshmisë së tij, i njëjti nuk ka dyshime te ndonjë person i caktuar, pasi ka deklaruar së nuk është i përfshirë në ndonjë konflikt.
Lidhur me rastin, Prokurori i Shtetit ka urdhëruar ndërmarrjen e veprimeve të nevojshme hetimore për identifikimin dhe kapjen e të dyshuarve.
