Një person ka mbetur i lënduar sot nga një mjet shpërthyes në fshatin Babaj Bokës të Gjakovës.
Zëdhënësi i Forcës së Sigurisë së Kosovës, Vëllazërim Qerimi, i ka mohuar raportimet ne media se i lënduar është pjesëtar i FSK-së.
“Nuk është e vërtetë që personi i lënduar në Babaj Bokës të Gjakovës i takon personelit të FSK-së. Dje ka përfunduar ushtrimi fushor në këtë fshat, por asnjë pjesëtar i FSK-së nuk është lënduar”, tha Qerimi.
Ndërsa, për sa i përket sigurisë në poligonin ushtarak që ndodhet në Babaj Bokës, Qerimi tha se ai nuk është i rrethuar, pasi hapësira është qindra metra katrorë.
“Poligoni nuk është tërësisht i rrethuar, pasi hapësira është tejet e madhe, janë qindra metra katrorë. Por, në të gjitha pjesët është e shënjuar se është zonë ushtarake”, tha ai.
