Faton Hajrizi nuk ka pranuar të dorëzohet se Policia e Serbisë.
Siç raportojnë mediat në Beograd, Hajrizi ka qëlluar me breshëri plumbash ndaj policëve që e kishin rrethuar në zonën ku po qëndronte.
Madje, të shtënat nga Hajrizi ishin aq të shumta sa policët serbë shpëtuan, sipas mediave serbe, vetëm falë jelekëve antiplumb dhe helmetave.
Policinë e Serbisë e informoi një qytetar i cili e pa Fatonin afër një pompe të derivateve.
Ndryshe, zëvendëskryeministri i Serbisë, njëherësh ministër i Punëve të Brendshme, Ivica Daçiq, ka thënë të premten se është vrarë personi që në orët e para të së enjtes vrau një polic në Serbi.
Identiteti i personit të vrarë nuk është përmendur në komunikatën e lëshuar nga autoritetet serbe në pasditen e 19 korrikut.
Daçiq më herët gjatë së premtes tha se autoritetet ishin në kërkim të Faton Hajrizit, i dyshuar për vrasjen e policit dhe plagosjen e një tjetri në Lloznicë, qytet në pjesën perëndimore të Serbisë.
Hajrizi, shtetas i Kosovës, dyshohet se kishte udhëtuar nëpër Serbi me dokumentet e vëllait të tij, Artanit, i cili është paraqitur para autoriteteve në Gjermani – ku dhe gjendet – se i vëllai, Fatoni ia kishte vjedhur pasaportën.
Që nga 6 korriku, Faton Hajrizi kishte qenë në kërkim nga autoritetet e Kosovës, pasi ishte arratisur nga burgu i Smerkonicës.
