Asociacioni i Gazetarëve të Kosovës (AGK) ka reaguar ndaj gjuhës jo-profesionale të përdorur nga një pjesëtar i Policisë së Kosovës ndaj gazetarit Irfan Maliqi, gjatë mbulimit të një marshi ndërgjegjësimi për kancerin e gjirit në qytetin e Vitisë.
Zyrtari policor M.S., dëgjohet duke i thënë gazetarit: “Mos më thuj prit kurrë më, për qeta ki me pas pasoja masandej”, me një qasje kërcënuese.
“Këto veprime janë të papranueshme dhe shkelin parimet themelore të lirisë së shtypit dhe të drejtës për informim. Gazetarët, si përfaqësues të informacionit publik, kanë të drejtë të kryejnë detyrën e tyre pa frikë nga presioni dhe kërcënimet. AGK thekson se veprimet e zyrtarëve të rendit duhet të jenë në përputhje me respektimin e të drejtave të njeriut dhe të lirisë së mediave”, thuhet në reagimin e AGK-së.
“Kërcënimet dhe intimidimi ndaj gazetarëve janë të papranueshme dhe dëmtojnë besimin në institucionet e sigurisë. Ne kërkojmë nga Policia e Kosovës dhe Inspektorati Policor i Kosovës të bëjnë një hetim të plotë dhe transparent për këtë incident. AGK do të vazhdojë të mbështesë gazetarët dhe të punojë për një mjedis më të sigurt dhe më të lirë për të gjithë ata që kontribuojnë në informimin e publikut”, është thënë tutje në reagim. /Gazeta Enigma
