Seanca e gjykimit në rastin e vrasjes së Liridona Ademajt, është shtyrë për të premten më 31 janar.
Lajmin për Gazeta “Enigma” e ka konfirmuar zëdhënësja e Gjykatës Themelore të Prishtinës, Mirlinda Gashi.
“Po, është shtyrë për të premten më 31 janar në ora 11:00”, tha Gashi.
Kërkesa e shtyrjes ka ardhur nga avokatët e të pandehurve për shkak të mungesës së disa shkresave të lëndës, të domosdoshme për përfundimin e procedurave gjyqësore.
Të akuzuar për vrasjen e 30-vjeçares janë ish-bashkëshorti Naim Murseli, Granit Plava, Kreshnik Kokalla, dhe Tom Dodaj.
Babai i Naim Murselit është kontaktuar nga emisioni “Kosova Today”, por ai ka refuzuar të flet për rastin, pasi gjendja e tij emocionale ishte e rëndë.
“Nuk po mundem asnjë fjalë, nuk e kam vizituar, jam i shokuar”, ishin fjalët e tij.
Kujtojmë se ngjarja tragjike ndodhi më 29 nëntor 2023 në fshatin Bërrnicë të Prishtinës. /Gazeta Enigma/
