Organizata e Veteranëve të Luftës së Ushtrisë Çlirimtare të Kosovës ka njoftuar se bojkotojnë Qeverinë në festimin e 17-vjetorit të Pavarësisë dhe 27 vjetorit të Epopesë, raporton Gazeta “Enigma”.
Veteranët sot kanë dalë me një vendim, për të mos bashkëpunuar me Qeverinë e Kosovës, lidhur me festimin e 17 vjetorit të shpalljes së Pavarësisë; dhe manifestimin në 27 vjetorit të Epopesë së UÇK-së të familjes Jashari të datës 5,6 dhe 7 mars.
OVL e UÇK-së, ka dhënë edhe arsyetimin e këtij vendimi, që është marrë në mbledhjen e sotme të kryesisë së kësaj organizate.
Sipas Organizatës së Veteranëve, qeveria aktuale nuk ka treguar asnjëherë gatishmëri për bashkëpunim, duke i përjashtuar ata nga çdolloj financimi dhe mbështetjeje.
“Duke parë të arsyeshme se kjo qeveri ka qenë qeveri që e ka shkelur çdo të drejtë tonën, ne si OVL e UÇK-së, do të organizohemi me degët tona në çdo komunë të Kosovës, që heronjtë, dëshmorët dhe sakrificën sublime të UÇK-së, në këto data historike, në mënyrë të organizuar nga kryesia e OVL UÇK-së dhe degët tona t’i festojmë dhe t’i nderojmë në mënyrën më fisnike që na përket neve si luftëtar të UÇK-së”. /Gazeta Enigma/
