Të paktën 32 persona janë vrarë në sulmet ajrore izraelite në Rripin e Gazës gjatë natës së kaluar, raportojnë autoritetet lokale dhe mediat ndërkombëtare, përfshirë Associated Press (AP).
Mes viktimave janë edhe nëntë anëtarë të një familjeje, të vrarë në një goditje ajrore në kampin e refugjatëve Nuseirat, në qendër të Gazës. Sulmet prekën edhe zona në veri të enklavës, duke shkaktuar dëme të mëdha dhe viktima në shtëpitë e banorëve.
Këto zhvillime ndodhën vetëm pak orë pasi kryeministri izraelit, Benjamin Netanyahu, deklaroi në Asamblenë e Përgjithshme të OKB-së se Izraeli “duhet ta përfundojë punën” kundër Hamasit në Gazë, duke sinjalizuar vijimin e ofensivës ushtarake.
Ndërkohë, presioni ndërkombëtar për një armëpushim po rritet. Disa shtete i kanë bërë thirrje presidentit amerikan, Donald Trump, që të ushtrojë ndikim mbi Izraelin për të ndalur luftimet.
Trump është shprehur se një marrëveshje për Gazën mund të jetë afër, ndërsa pritet të takohet me Netanyahun të hënën për të diskutuar më tej zhvillimet.
