Tyson Fury i ka rindezur sërish spekulimet për një përballje të madhe me Anthony Joshuan, pas rikthimit të tij në ring dhe fitores bindëse ndaj Arslanbek Makhmudov.
Pas meçit, Fury e sfidoi publikisht rivalin e tij britanik, duke e ftuar për një duel të shumëpritur që fansat e boksit e kërkojnë prej më shumë se një dekade.
Kjo përballje, e njohur si “Battle of Britain”, konsiderohet një nga ndeshjet më të mëdha që ende nuk është realizuar në kategorinë e peshave të rënda, njoftojnë mediat britanike.
Megjithatë, nga ana e tij, Joshua nuk nxitoi të japë një përgjigje të drejtpërdrejtë.
Ai e quajti Furyn një “kërkues vëmendjeje” dhe theksoi se çdo marrëveshje duhet të bëhet përmes negociatave serioze, jo përmes deklaratave publike.
Pavarësisht tensioneve mes tyre, të dy boksierët mbeten të hapur për një përballje të madhe në të ardhmen.
Promotorët dhe palët e interesuara janë duke punuar në prapaskenë për ta realizuar këtë duel, i cili pritet të jetë një nga ngjarjet më të mëdha në historinë moderne të boksit.
Sipas raportimeve, një përballje mes Furyt dhe Joshuas mund të zhvillohet në fund të vitit 2026 ose në fillim të vitit 2027, nëse palët arrijnë marrëveshje përfundimtare.
Ndërkohë, Joshua pritet të rikthehet fillimisht në ring me një ndeshje tjetër për t’u rikthyer në formë, pasi karriera e tij u ndërpre përkohësisht nga një aksident i rëndë automobilistik në fund të vitit 2025.
Në çdo rast, përballja mes Furyt dhe Joshuas vazhdon të mbetet një nga duelet më të kërkuara në botën e sportit dhe, nëse realizohet, pritet të thyejë rekorde shikueshmërie dhe fitimesh.
