Kryeministri në detyrë i Kosovës, Albin Kurti, ka mbrojtur vendimin e Qeverisë për ndarjen e 2 milionë eurove për subvencionimin e linjave ajrore që lidhin Aeroportin “Adem Jashari” me destinacionet prej nga vjen mërgata kosovare, duke arsyetuar se edhe shumë shtete tjera e bëjnë.
Ai tha se masa është marrë për të parandaluar anulimin e fluturimeve gjatë muajve korrik dhe gusht, si pasojë e rritjes së kostos së karburantit.
Sipas Kurtit, anulimi i fluturimeve do të ndikonte negativisht tek bashkatdhetarët dhe ekonomia e vendit, pasi një numër i madh i mërgimtarëve nuk do të mund të vizitonin Kosovën gjatë verës.
Ai theksoi se subvencionimi mbulon periudhën deri në fund të tetorit dhe se nuk ka të bëjë me blerje biletash apo organizim për zgjedhje, por me një skemë mbështetëse që, sipas tij, aplikohet edhe nga shtetet e rajonit.
Reagimi i plotë:
Subvencionimin e linjave ajrore për destinacione të caktuara e bëjnë shumica e shteteve ne rajon e më gjerë, me qëllim nxitjen e turizmit.
Me mërgatën tonë të mrekullueshme që nuk humb asnjë vit pa ardhur në vendlindje, ne e kemi edhe një arsye më shumë që ta bëjmë këtë. E përballë rrezikut që një pjesë e fluturimeve të planifikuara gjatë muajve korrik dhe gusht të anulohen për shkak të rritjes së kostos së karburantit, vendimi ynë i djeshëm për të subvencionuar linjat ajrore që lidhin destinacionet e mërgatës sonë u bë i domosdoshëm.
Anulimi i fluturimeve në muajt e verës, do të nënkuptonte që një numër i konsiderueshëm i bashkatdhetarëve të mos mund te vinin siç vijnë zakonisht në muajt korrik dhe gusht. E kjo do të ishte keq për ta dhe familjet e tyre, por do të ishte fatale edhe për ekonominë e vendit. Prandaj kam angazhuar ministrat Hekuran Murati dhe Dimal Basha për të parë mundësinë e një mase që do ta parandalonte një situatë të tillë.
Vendimi i djeshëm për të ndarë 2 milionë euro ka për qëllim subvencionimin e linjave ajrore që lidhin Aeroportin “Adem Jashari” me aeorportet prej nga vijnë mërgata jonë, dhe mbulon periudhën e mbetur të sezonit veror të aviacionit, që është deri në fund të muajit tetor.
Pra nuk bëhet fjalë për blerje biletash apo ardhje të organizuar për zgjedhje, siç u pretendua nga disa qarqe të bllokut opozitar. Kjo është një skemë mbështetëse sikurse e bëjnë shumica e shteteve të rajonit, e cila mundëson që mërgata jonë të mund të vijnë e të na vizitojnë edhe këtë verë, sikurse çdo vit.
Mërgatë, mirë se vini!
