Kryetari i Lidhjes Demokratike të Kosovës, Lumir Abdixhiku, ka zhvilluar një takim me artistë, shkrimtarë, piktorë dhe personalitete të artit e kulturës në Soma Book Station, ku diskutuan për rëndësinë e kulturës në ndërtimin e identitetit dhe të ardhmes së vendit.
Gjatë bashkëbisedimit, u trajtuan tema që lidhen me artin, librin, skenën, trashëgiminë kulturore dhe rolin e krijimtarisë në forcimin e identitetit kombëtar.
Abdixhiku theksoi se kultura zë një vend të veçantë në programin e tij politik, duke kujtuar se në kuadër të 113 zotimeve të prezantuara, janë paraparë projekte të rëndësishme për zhvillimin kulturor të Kosovës. Ndër to përfshihen ndërtimi i Operës dhe Baletit “Dr. Ibrahim Rugova”, Teatri i ri Kombëtar, Muzeu i Paqes dhe Rezistencës, Muzeu i Artit Bashkëkohor dhe Qendra e Librit.
“Shteti ndërtohet me identitet, kujtesë dhe krijimtari. Me artistët, shkrimtarët, piktorët dhe njerëzit e kulturës që i japin shpirt shoqërisë sonë. Prandaj, arti dhe kultura nuk do të jenë në margjina, por pjesë e dinjitetshme e zhvillimit të Kosovës”, ka deklaruar Abdixhiku.
Sipas tij, investimi në kulturë nuk është vetëm mbështetje për artistët, por edhe investim në identitetin, kujtesën kolektive dhe zhvillimin afatgjatë të vendit
