Organi Shqyrtues i Prokurimit (OSHP) ka marrë një vendim të rëndësishëm ndaj operatorit ekonomik “Rahovica” SHPK, duke e diskualifikuar për tetë muaj nga pjesëmarrja në prokurimet publike.
Vendimi lidhet me aktivitetin e prokurimit për “Asfaltimin e rrugëve në Bajgorë, Rashan, Tërsten, Kutllovë dhe Vllahi”, projekt i Komunës së Mitrovicës së Jugut në bashkëfinancim me MMPHI-në, me numër prokurimi 642-25-5633-5-1-1.
Sipas vendimit të siguruar nga Ballkani.info, Komuna e Mitrovicës së Jugut i ishte drejtuar OSHP-së duke kërkuar marrjen e masave ndaj “Rahovicës”, me pretendimin se operatori ekonomik kishte paraqitur dokumente/dëshmi me përmbajtje të rreme ose të falsifikuara.
Në qendër të rastit ishte një rimorkio-kompresor, e cila ishte paraqitur si pjesë e kapaciteteve teknike të kompanisë.
OSHP ka konstatuar se dokumentacioni i paraqitur për këtë pajisje kishte mospërputhje lidhur me pronësinë. Në dokumente figuronin emra të ndryshëm të subjekteve, ndërsa në komunikimet e cituara në vendim ngriheshin pikëpyetje serioze për mënyrën se si dokumentacioni ishte përdorur në procedurën e prokurimit.
“Tentoi të mashtrojë autoritetin kontraktues”
Në arsyetimin e vendimit, Paneli Shqyrtues shprehet se operatori ekonomik kishte paraqitur dokumentacionin e pajisjes duke ndryshuar të dhënat dhe se, sipas vlerësimit të Panelit, kjo përbënte veprim në kundërshtim me rregullat e prokurimit publik.
OSHP e ka lidhur këtë veprim me nenin 99.2 të Ligjit për Prokurimin Publik, i cili i jep kompetencë OSHP-së të diskualifikojë operatorët ekonomikë kur autoriteti kontraktues paraqet kërkesë lidhur me të dhëna të rreme ose dokumente të falsifikuara.
8 muaj jashtë prokurimeve publike
Pas shqyrtimit të dokumenteve, deklarimeve të palëve dhe provave të paraqitura, Paneli Shqyrtues ka vendosur që “Rahovica” SHPK të diskualifikohet nga pjesëmarrja në prokurim publik për tetë muaj.
Sipas vendimit, masa është përcaktuar nga 6 gushti 2026 deri më 5 prill 2027.
Në këshillën juridike të vendimit thuhet se kundër tij nuk lejohet ankesë, por pala e pakënaqur mund t’i drejtohet gjykatës kompetente me kërkesëpadi për anulimin e vendimit, brenda 30 ditësh nga pranimi i vendimit.
Ky vendim e nxjerr edhe një herë në pah peshën e dokumentacionit të dorëzuar nga kompanitë në tenderët publikë: një mospërputhje e konsideruar nga autoritetet si falsifikim mund të rezultojë me përjashtim nga tregu i prokurimit për muaj të tërë. /Ballkani.info/
