Anëtari i kryesisë së Partisë Demokratike të Kosovës, Adri Nurellari, ka komentuar në facebook lidhur me heshtjen e kryeministrit Kurti për përfshirjen e ministrit të tij Rakiq në fillimin e ndërtimit të universitetit të strukturave paralele në Mitrovicë.
Këtë akt ai e konsideron si “shumë të rëndë e sfidues ndaj sovranitetit dhe integritetit të Kosovës” duke e krituar Kurtin për dyfytyrësi sepse për një gjë shumë më të vogël sikurse qe një fjalë goje e Jabllanoviqit, ai ka ndërmarrë protesta të dhunshme në Kosovë.
Më tej Nurellari kujton rrethanat e atyre protestave të vitit 2015 duke thënë se “Pra para gjashtë vjetësh Kurti qe i gatshëm të shkatërronte Prishtinën me molotov e gurë, për një fjalë goje që Jablanoviq tha për aktivistët e Vetëvendosjes që goditën me sende të forta autobusin e mbushur me pleq serb.”
Ndërsa si pas tij sot që është në pushtet ai nuk ka kurajo as për një qortim e jo më për shkarkim ndaj Rakiqit, ndërkohë që veprimi I ministrit të Kurtit është shumë më i dëmshëm për Kosovën sesa fjala egërsisë e nxjerrë prej gojës së Jabllanoviqit.
