Në vizitën e tij të parë jashtë vendit, kancelari i sapoinaguruar i Austrisë, Alexander Schallenberg, udhëtoi për në Bruksel për t’u takuar me Presidenten e Komisionit Evropian, Ursula von der Leyen dhe Presidentin e Këshillit, Charles Michel.
Në këtë takim ai foli për përparësitë kryesore të administratës së tij.
Schallenberg, i cili punoi në Bruksel dhe studioi në Kolegjin e Evropës, iu referua udhëtimit të tij në Bruksel si një “kthim në shtëpi” dhe theksoi se ishte “sinjal i qëllimshëm” për të treguar se Austria dëshiron të bashkëpunojë ngushtë me BE -në për të përballuar sfidat përpara.
Ai gjithashtu theksoi se dëshiron të vazhdojë kursin e paraardhësit të tij, Sebastian Kurz, i cili u detyrua të japë dorëheqjen pas skandalit me korrupsion, shkruan Euractiv.
“Qëllimi më i rëndësishëm i Austrisë është që të mos ketë më ndarje në Evropë,” tha Schallenberg, duke shtuar se zgjerimi i BE -së në Ballkanin Perëndimor është “çështje e zemrës” për të.
Në një mënyrë të ngjashme, ai tha se nuk dëshiron t’u japë vendeve të Evropës Lindore përshtypjen se ato janë shtete anëtare të rangut të dytë.
Schallenberg theksoi gjithashtu se ai do të vazhdonte kursin konservativ fiskal të ish -kancelarit dhe qëndrimin e ashpër të Austrisë ndaj migrimit. /Gazeta “Enigma”/
