Deputeti i Kuvendit të Kosovës, Anton Quni, ka folur për situatën në Ukrainë, pasi këtë mëngjes u sulmua nga Rusia.
Ai tha se Rusia është shndërruar në agresion që synon të arrijë interesat e ngushta të politikëbërësve të Rusisë
“Parashikimet nga orët e mëngjesit po bëhën realitet, përkundër nga ata se nga autoritetet e Rusisë është pretenduar se bëhet fjalë për një ushtrim masiv ushtarak, por ishin veprime me të cilat ata mundoheshin të maskonin operacionin strategjik dhe tani është shndërruar në një agresion, në të cilin synohen të arrihen interesat e ngushta të politikëbërësve të Rusisë”, u shpreh Quni në T7.
Ai ka thënë se duhet parë nëse situata në Ukrainë mund të prodhojë efekte edhe në Kosovë.
“Sado që autoritetet e Ukrainës bëjnë thirrje që qytetarët të ruajnë gjakftohësinë, është e natyrshme që qytetarët t’i nënshtrohen frikës, presionit, tani kur nga mediat marrin pamjet ku viktima janë edhe një numër i konsiderueshëm i civilëve….Duhet të shikohet çka nëse këto kërcënime prodhojnë edhe efekte zingjirore edhe tek ne në Ballkan, posaçërisht kur e kemi një problem specifik siç janë raportet tona me Serbinë”, u shpreh ai tutje.
