Sulmuesi shtatlartë i Kombëtares së Kosovës në futboll, Atdhe Nuhiu, zyrtarisht është larguar nga ekipi përfaqëues. Kështu ka njoftuar vet ai përmes rrjeteve sociale, duke mos bërë të ditura arsyet e largimit të tij.
Nuhiu e ka cilësuar këtë vendim të tij si më të vështirin si profesionist në futboll, por nuk dha arsyet që e sollën deri në marrjen e këtij vendimi.
Më poshtë deklarata e tij e plotë:
Të dashur adhurues të Kombëtares së Kosovës , të dashur bashkëkombas të mi: Po u drejtohem sot, për t’iu njoftuar se kam marrë vendimin më të vështirë në karrierën time si profesionist në futboll. Kam vendosur të ndaj me ju lajmin e tërheqjes sime nga Kombëtarja e Republikës së Kosovës, një ekipi me të cilin kam kujtime të jashtëzakonshme dhe momente të paharrueshme, gjatë rrugëtimit 4 – vjeçar.
Më kujtohet takimi i parë me udhëheqësit e Kombëtares së Kosovës kur pranova me krenari të luaj për këtë kombëtare. Gjithmonë do të jem falënderues për kryesinë e Kombëtares, të gjithë bashkëlojtarët e mi, kryetarin Agim Ademin, nga i cili kishim mbështetjen maksimale edhe në kushtet më të vështira, ish – trajnerin Albert Bunjaku me të cilin bashkëpunova nga dita e parë në kombëtare dhe qëllimin e vetëm e kishim të punojmë në mënyrë sa më profesionale e të ndërtojmë një ekip apo një kombëtare që e ëndërruan shumë gjenerata para nesh. Sot Kombëtarja e Kosovës ka një super ekip dhe shpresë për lavdi e suksese në arenë ndërkombëtare, madje duke dëshmuar se mund të konkurojmë me kombëtare si Anglia, Spanja etj. Dua të falënderoj të gjithë fansat e kombëtares, të cilët kurrë nuk na lanë vet, në çdo ndeshje, në çdo udhëtim dhe në çdo moment. Ju përqafoj të gjithëve dhe jeni në zemrën time përgjithmonë. Përjetësisht falënderues dhe me shumë dashuri,
I juaji, Atdhe Nuhiu
