Ish-prokurori Elez Blakaj, në profilin e tij në Facebook ka shkruar se Këshilli Prokurorial i Kosovës është institucion që nuk ka kredibilitet dhe ka paralajmëruar parregullsi edhe në zgjedhjen e Kryeprokurorit të ri të Shtetit, raporton Gazeta ‘Enigma’.
Blakaj ka thënë se KPK përdoret nga disa persona për “ruajtje të monopolit dhe pushtetit për njërit tjetrin” dhe se të njëjtit i trajtojnë këto institucione si prona private.
“Kur interesat e një grupi e sfidojnë interesin publik! Edhe në proceset e privatizimeve në Kosovë të udhëhequra nën drejtimin e AKM-së kemi parë procese të cilat formalisht janë mbuluar me letra, madje as aty, nuk është arritur në çdo rast të dalin fitues shantazhuesit, kërcënuesit dhe dhunuesit, pavarësisht strategjive të përdorura, ndërsa Këshillit Prokurorial të Kosovës nuk po ua huq asnjëherë!”.
“Të gjithë kemi parë këto vitet e fundit se si të njëjtit persona kanë bredhur në vazhdimësi nga një zyre tek tjera, duke e ndihmuar dhe favorizuar njëri tjetrin në pozita të ndryshme nga Këshilli Prokurorial për në zyrën e Kryeprokurorit të Shtetit dhe poashtu në pozita tjera në cilësi të kryeprokurorëve dhe anasjelltas, me qëllim të ruajtjes se monopolit dhe pushtetit për njëri tjetrin, duke i trajtuar këto institucione si të ishin pronë private! E fotografi të njëjtë presim të shohim edhe tani me rastin e përzgjedhjes se Kryeprokurorit të Shtetit!!!”, shkruan ai.
Blakaj shton se pozita e Kryeprokurorit është me interes të veçantë dhe ka akuzuar KPK-në për mungesë të integritet gjatë kryerjes së veprimeve.
Ai ka thënë se këto keqpërdorime janë evidentuar edhe me raporte ndërkombëtare.
“Qasja e Këshillit Prokurorial, sjelljet dhe veprimet e tyre, skandalet e shumta, vendimet e kundërligjshme, konflikti i interesit, transferet dhe avancimet me standarde të dyfishta, qartë kanë shpërfaqur fotografinë e vërtetë dhe mungesën e integritetit të këtij institucioni”.
“Madje, për disa nga problemet brenda këtij institucioni kanë reaguar edhe raporte e opinione ndërkombëtare, si dhe partner e miq të cilët e kanë ndihmuar në vazhdimësi Këshillin Prokurorial! Pozita e Kryeprokurorit të Shtetit është pozitë me interes të lartë publik, andaj edhe detyrat dhe përgjegjësit qe ka Kryeprokurori janë drejtpërdrejtë të ndërlidhura dhe në shërbim të publikut, e jo të grupit të njëjtë të personave të cilët po përgaditen ta zyrtarizojnë emrin e personit i cili është pjesë e këtij grupi!”, shtoi ai.
Tutje ai ka thënë se pavarësisht zhvillimeve që pritet të ndodhin gjatë ditëve në vijim, reformat duhet të vazhdojnë.
“Pavarësisht të gjitha zhvillimeve të cilat pritën të ndodhin në ditët dhe javët në vazhdim brenda Këshillit Prokurorial dhe jo vetëm, reformat duhet të vazhdojnë sepse janë mjeti më i mirë i cili do të ndihmonte dhe shëronte këtë lloj mentaliteti, i cili me punën e tij ka ndërtuar besueshmëri tejet të ulët në raport me publikun, duke ngecur brenda interesave të të njëjtit grup personash të përmendur me lartë! SOT, për të gjitha këto veprime dhe vendime është përgjegjës Këshilli Prokurorial i Kosovës, NESËR do të jemi përgjegjës të gjithë!“, përfundoi ai./Gazeta Enigma/
