Tani është pothuajse komike të shikohet prapa në mesin e korrikut, kur trajneri i Napolit, Luciano Spalletti, u tha tifozëve protestues të “heshtin” ndërsa prezantoi ekipin në hapjen e fazës përgatitore. Tifozët e klubit jugor ishin të zemëruar pas largimit të golashënuesit më të mirë, Dries Mertens, kapitenit vendës Lorenzo Insigne dhe mbrojtësit të fortë Kalidou Koulibaly.
Në muajin maj, makina “Fiat Panda” e Spallettit ishte vjedhur – me tifozët ultras që vendosën një pano duke thënë se do t’i kthehej vetëm nëse ai largohej nga Napoli.
Protestat duken si histori e lashtë tani, pas fillimit më emocionues të Napolit që nga ditët kur Diego Armando Maradona luante për skuadrën. Një fitore 1:0 ndaj skuadrës fizike të Romës së Jose Mourinhos të dielën, shënoi fitoren e 11-të radhazi në të gjitha garat për Napolin, duke arritur rekordin e klubit të vendosur në vitin 1986 me Maradonan.
Napoli, që prin në tabelë me tri pikë më shumë se kampioni në fuqi, Milani, i ka fituar edhe katër ndeshjet e Ligës së Kampionëve për të siguruar kalimin në fazën e nokautit kur kanë mbetur edhe dy xhiro të pazhvilluara në grup. Rrugën në Evropë, Napoli e ka bërë me një fitore 4:1 ndaj finalistit të sezonit të kaluar Liverpoolit dhe 10 gola të shënuar në dy ndeshje kundër Ajaxit.
Është koha për të filluar festën? Jo plotësisht, thotë Spalletti.
“Titujt nuk fitohen pas 11 ndeshjeve. Ju fitoni tituj në maj, qershor ose gusht – sa herë që përfundon sezoni. Ne duhet të mbajmë këmbët tona në tokë pa asnjë supozim, pa e mbajtur veten si fenomen”, tha Spalletti. “Ne do të vazhdojmë të hamë sandviçët tanë në tren dhe duhet të mbajmë veten po aq të kthjellët sa deri tani”.
Faktorët që qëndrojnë pas transformimit të papritur të Napolit nga një sfidues i përhershëm në një kundërshtar të pamposhtur janë në lëvizjet inteligjente të tregut, aftësia e Spallettit për të marrë përgjegjësinë me legjendat e klubit dhe një stil modern i sulmit të vazhdueshëm që është ende i rrallë në Italinë me mendje mbrojtëse. Tifozët mbetën duke mbajtur kokat e tyre kur Napoli solli anësorin e panjohur më parë, një 21-vjeçar nga Gjeorgjia, Khvicha Kvaratskhelia, për të zëvendësuar Insignen në krahun e majtë dhe qendërmbrojtësin e Koresë së Jugut, Kim Min-jae për Koulibalyn.
Kvaratskhelia dhe Kim janë bërë dy nga lojtarët më të mirë në ligë këtë sezon. Kvaratskhelia, një magjistar driblimi, u zgjodh lojtari më i mirë i muajit gusht në Serie A dhe tashmë ka shtatë gola dhe disa asistime në 15 ndeshje në të gjitha garat. Kim, lojtari më i mirë i ligës për muajin tetor, ka demonstruar po aq fizik sa Koulibaly. Kundër Romës ai pothuajse i vetëm e mbajti sulmuesin Tammy Abraham. Po ashtu, duhet shtuar edhe ardhjet e sulmuesit 22-vjeçar të Italisë, Giacomo Raspadori, i cili ka shënuar pesë gola, dhe Giovanni Simeone, i cili ka katër gola. Ata kanë bërë që mungesa e Mertensit si qendërsulmues mos të ndihet fare.
Raspadori dhe Simeone mbuluan me sukses mungesën e Victor Osimhenit kur sulmuesi i Nigerisë ishte jashtë për gati dy muaj me një lëndim në kofshën e djathtë.
Osimhen që atëherë është rikthyer dhe ka shënuar në tri ndeshje radhazi, duke përfshirë edhe golin e fitores kundër Romës. Napoli ishte përmendur si një nga destinacionet më të mundshme për Cristiano Ronaldon kur spekulimet ishin të shumta se pesë herë fituesi i “Topit të Artë” do të largohej nga Manchester United në gusht. Këto spekulime janë aktualizuar edhe të hënën.
Spalletti madje foli hapur për mirëseardhjen e Ronaldos në ekipin e tij.
Spalletti ka kontroll të plotë mbi skuadrën e tij. Mungesa e veteranëve si Mertens, Insigne dhe Koulibaly i ka mundësuar trajnerit të frikshëm që të shmangë llojin e situatës së ndërlikuar në të cilën u fut gjatë periudhës së tij të dytë si trajner i Romës, në sezonin 2016/17, kur iu desh të lëshonte legjendën e klubit Francesco Totti në pension, duke u bërë shënjestër e inatit të fansave.
Stili inovativ i Spallettit u tregua për herë të parë premtues në Udinese gati dy dekada më herët, kur ai udhëhoqi klubin provincial drejt një vendi të katërt dhe një vendi në Ligën e Kampionëve. Ai fitoi dy Kupa të Italisë me Romën në 2007 dhe 2008 dhe më pas ngriti trofe të ligës ruse me Zenitin. E vetmja gjë që i mungon karrierës së Spallettit është titulli i ligës italiane – i cili tani duket i arritshëm. Napoli, natyrisht, nuk e ka fituar “Scudetton” qëkur Maradona udhëhoqi klubin në dy titujt e tij të vetëm të ligës vendëse më 1987 dhe 1990. Kur Maradona vdiq në vitin 2020, stadiumi i ekipit u riemërua “Stadio Diego Armando Maradona” – ku klubi do të synojë fitoren rekorde, të 12-tën radhazi kundër Rangersit në Ligën e Kampionëve të mërkurën.
