Lëvizja Vetëvendosje ka arritur dakordim në parim për shpalljen e procesit të zgjedhjeve të brendshme partiake. Kjo u bë e ditur pas një mbledhjeje të përbashkët të mbajtur sonte në zyrën qendrore të Lëvizjes Vetëvendosje, ku morën pjesë drejtuesit e Qendrave të Lëvizjes Vetëvendosje në Kosovë dhe në mërgatë, anëtarë të Kryesisë Qendrore, kryetari i partisë, Albin Kurti, sekretari organizativ, Alim Rama, si dhe koordinatori i Qendrave, Salih Zyba. Sipas njoftimit të Vetëvendosjes, një pjesë e rëndësishme e diskutimeve iu kushtua çështjeve të brendshme organizative, me theks të veçantë te procesi i zgjedhjeve të brendshme. “Pas diskutimeve me drejtuesit e Qendrave dhe anëtarët e Kryesisë, në parim u arrit dakordim për shpalljen e procesit të zgjedhjeve të brendshme”, thuhet në njoftim. Sipas njoftimit, ky proces synon ripërtëritjen, konsolidimin dhe fuqizimin e strukturave organizative, zgjerimin e pjesëmarrjes së anëtarësisë, avancimin e kuadrove dhe forcimin e lidhjes së Lëvizjes me qytetarët.