Numërimi i votave që kanë ardhur nga jashtë Kosovës, përmes postës, vazhdon në Qendrën e Numërimit të Rezultateve të Komisionit Qendror të Zgjedhjeve (KQZ).
Në përditësimin më të fundit, Komisioni Qendror i Zgjedhjeve (KQZ) ka publikuar rezultatet e numërimit të 8.51 për qind të votave të ardhura me postë.
Lëvizja VETËVENDOSJE (VV)ka marrë 45.79% të votave ose 1,293 vota.
Lidhja Demokratike e Kosovës (LDK) mban vendin e dytë me 1,010 vota, ose 35.76%. Pas saj, Aleanca për Ardhmërinë e Kosovës (AAK) ka marrë 335 vota, që përbën 11.8%.
Nga ana tjetër, Partia Demokratike e Kosovës (PDK) ka mbetur pas këtyre dy subjekteve, duke arritur vetëm 98 vota, ose 3.47% të totalit të votave të numëruara deri tani.
Të gjithë shtetasit e Kosovës, që gjatë regjistrimit u përcaktuan individualisht për të votuar përmes postës, mund të dërgonin pakon e tyre me fletëvotim në adresë të ndonjërës nga kutitë postare të Komisionit Qendror të Zgjedhjeve të hapura në shtete të ndryshme.
Numri i pakove të supozuara me fletëvotime dhe që janë aprovuar nga KQZ, pas procesit të vlerësimit, është më shumë se 63 mijë sosh.
