Zyra e Prokurimit ka marrë sot vendim të pezullojë aktivitetin e prokurimit për ndërtimin e stadiumit të Gjilanit.
Ata kanë dhënë si arsye paraqitjen e dy ankesave në OSHP, teksa thanë se do të njoftojnë me kohë për marrjen e çfarëdo vendimi.
Ky vendim e gjuan poshtë tentimin e Ministrsë së Kulturës, Rinisë dhe Sportit që e kundërshtonin pezullimin e tillë, madje duke pretenduar se raportimet e gazetarëve nuk ishin korrekte.
“Njoftojmë opinionin publik, mediat dhe gazetarët e interesuar se raportimi për pezullimin e tërësishëm të procedurës së prokurimit për ndërtimin e stadiumit të Gjilanit, nuk është i saktë”, shkruhej në njoftimin e MKRS-së.
Qyteti i Gjilanit ka shumë vjet që e vuan mungesën e stadiumint, anise dy klube të këtij vendi, janë ndër protagonistët kryesorë të futbollit kosovar.
Përballja ndërmjet Dritës dhe Gjilanit, konsiderohet ndër derbit më të zjarrtë në rajon e më gjërë, pasi të dyja skuadrat kanë tifozëri fantastike.
Kryetari i kësaj komune, Alban Hyseni, pa iu dridhur qerpiku e kishte bërë një premtim në vitin 2021, teksa ekipet e qytetit po përballeshin në fushën ndihmëse me bari sintetik.
“Në një stadium si ky, pa plotësimin e asnjë kushti, nuk do të zhvillohet më një derbi i këtij niveli”, ishin fjalët e Hysenit, transmeton Klankosova.tv.
Sot katër vjet më vonë, vazhdon “telenovela tragji-komike” rreth stadiumit të Gjilanit, qytet ky s’ndalet duke vuajtur mungesën e një impianti normal futbollistik.
