Ka dështuar të mbahet seanca e së mërkurës ndaj 15 të akuzuarve, të cilët së bashku me ish-deputetin Ukë Rugova dhe të tjerët po dyshohen për mashtrim me viza italiane.
Në këtë rast po akuzohen Fitim Beqiri, Azad Beqiraj, Liridona Beqiri, Kujtim Avdyli, Ragip Gashi, Visar Beqiri, Hamza Beqiri, Azem Koskoviku, Edison Idrizaj, Beg Shaqiri, Hasan Shaqiri, Dritëro Voca, Valon Selimi, Fadil Ahmeti dhe Haxhi Islami.
Shkak për dështimin e seancës së të mërkurës u bë mungesa e pesë të akuzuarve dhe pesë avokatëve.
Këta 15 të akuzuar janë pjesë e aktakuzës bashkë me ish-deputetin Ukë Rugova, ish-ministrin e Ministrisë së Kulturës, Rinisë dhe Sportit, Astrit Haraqija, si dhe Florjan Petanit, Qefser Baholli dhe Izet Beqirit, por rasti ndaj tyre ishte veçuar.
Në seancë munguan të akuzuarit Azad Beqiri, Liridona Beqiri, Kujtim Avdyli, Edison Idrizaj dhe Driton Voca, shkruan “Betimi për Drejtësi”.
Po ashtu, në këtë seancë kanë munguar edhe mbrojtësja e të akuzuarës Liridona Beqiri, avokatja Marigona Berisha, mbrojtësi i Ragip Gashit, avokati Diamant Zeka, mbrojtësi i Azem Koskovikut, avokati Fehmi Shala, mbrojtësi i Edison Idrizit, avokati Gzim Kollqaku, dhe mbrojtësja e të akuzuarit Driton Voca, avokatja Saranda Beqiri.
Në mungesë të kushteve ligjore për mbajtjen e seancës, kryetari i trupit gjykues, gjykatësi Kujtim Krasniqi e ka shtyrë këtë seancë, ndërsa e radhës pritet të mbahet më 9 shkurt 2022.
Ndryshe, ky rast gjykohej nga misioni i EULEX-it, por pas përfundimit të mandatit, lënda ishte transferuar të vendorët.
Pasi që lënda ishte transferuar tek gjykatësit vendorë, në janar të vitit 2018, përpjekja e parë për mbajtje të seancës ishte bërë pas një viti, përkatësisht në janar të vitit 2019, mirëpo kjo seancë kishte dështuar në mungesë të katër të akuzuarve.
Aktakuza e Prokurorisë Speciale të Republikës së Kosovës (PSRK), e ngritur më 16 maj të vitit 2016, e ngarkon Ukë Rugovën se gjatë periudhës maj 2011 deri në shkurt 2014 ka menaxhuar një grupi kriminal duke furnizuar individë me viza shengen të BE-së, nga Ambasada Italiane në Prishtinë. Të gjitha këto viza supozohet se janë marrë në mënyrë të paligjshme nëpërmjet shtrembërimit apo korrupsionit.
Aktakuza që ishte përpiluar nga prokurori Allen Cansick, thekson se PSRK-ja ka pranuar nga Prokuroria Italiane në Romë një kopje të dosjes së tyre lidhur me vizat ku përfshihet edhe emri i ish–ambasadorit Italian në Kosovë Michael Giffoni.
PSRK-ja po pretendon se 15 të akuzuarit Fitim Beqiri, Azad Beqiraj, Liridona Beqiri, Kujtim Avdyli, Ragip Gashi, Visar Beqiri Hamza Beqiri, Azem Koskoviku, Edison Idrizaj, Beg Shaqiri, Hasan Shaqiri, Dritëro Voca, Valon Selimi, Fadil Ahmeti dhe Haxhi Islami, kishin vepruar si grup kriminal bashkë me Ukë Rugovën dhe të tjerët, me qëllim sigurimin e përfitimit material në atë mënyrë që qytetarët të pajisen me viza shengen nga Ambasada Italiane në Prishtinë.
Ky rast është ndarë në dy pjesë pasi siç kishte thënë gjykatësja Naime Krasniqi-Jashanica, një gjë e tillë është bërë në mënyrë që gjykim të jetë më efikas. / Gazeta Enigma.
