“Do të vij në Kosovë”, ishte premtimi i Papa Françeskut dhënë presidentes së Kosovës, Vjosa Osmanit, raporton Gazeta Enigma.
Kështu njoftoi presidentja e cila theksoi se kjo kishte ndodhur “gjatë audiencës që kisha me të në Selinë e Shenjtë”.
Sipas Osmanit ky sinjal ishte tregues se “sa shumë dashuri kishte për vendet më të vogla, sidomos për popullin e përvuajtur të Kosovës”.
“Këtë vizitë, fatkeqësisht nuk arriti ta realizojë, sepse Shenjtëria e Tij, Papa Françesku kaloi në amshim, por do të kujtohet si një udhëheqës shpirtëror që me përulësinë, mençurinë dhe dashurinë e tij të pakufishme i dha botës një shembull të rrallë njerëzie dhe shërbimi”, tha Osmani.
“Papa Françesku do të kujtohet si Papa i paqes, i të varfërve dhe i dialogut ndërfetar, një figurë që i dha forcë fjalës së dhembshurisë dhe e jetoi misionin e tij me guxim e përkushtim. Populli i Kosovës do t’i jetë gjithmonë mirënjohës për fjalët e ngrohta dhe kujdesin e vazhdueshëm që Papa Françesku tregoi ndaj nesh. Ai ishte një zë që i dha rëndësi vuajtjes së të pafajshmëve dhe shpresës për një të ardhme më të ndritur”, shtoi ajo.
Në emër të qytetarëve të Republikës së Kosovës, Osmani shprehu ngushëllimet më të sinqerta për këtë humbje të madhe për Kishën Katolike dhe për mbarë njerëzimin. Mendimet dhe lutjet tona janë me besimtarët katolikë në mbarë botën.
“U prehtë në paqe shpirti i Shenjtërisë së Tij!”
