Malisheva ka shënuar fitore të rëndësishme në udhëtim te Gjilani, në kuadër të xhiros së katërt në Superligën e Kosovës.
Edhe pse Gjilani ishte favorit, Malisheva zhvilloi një paraqitje fantastike për t’i arkëtuar pikët e plota me rezultat 1:3.
Mevlan Zeka realizoi nga afërsia për ta zhbllokuar rezultatin pas vetëm shtatë minutave lojë.
Megjithatë, Gjilani dha pak ‘shenja jete’ falë Armend Thaqit, i cili shënoi pas topit të kthyer nga pritja e portierit (12’).
Mirëpo, Malisheva më vonë shënoi dy herë brenda pesë minutave për t’i fituar pikët e plota. Fillimisht, Samuel Opeh pas një tollovie në mbrojtje e dërgoi topin brenda rrjetës (73’), kurse ishte Altin Aliu që me një goditje të bukur e përmbylli një kundëraksion fantastik për epilogun përfundimtar 1-3.
Për Malishevën kjo është fitorja e parë këtë edicion, ku ka katër pikë, aq sa ka edhe Gjilani.
