Kreu i AAK-së, Ramush Haradinaj ka shkruar pas vdekjes së ambasadorit gjerman në Kinë, Jan Hecker, raporton Gazeta “Enigma”.
Ai ka thënë se vdekja e tij është humbje edhe për Kosovën.
Këto komente Haradinaj i ka bërë përmes një shkrimi në Facebook.
“Me dhembje të madhe mora lajmin për vdekjen e Ambasadorit të Gjermanisë në Kinë, Prof. Jan Hecker. Me ish-këshilltarin e Kancelares Merkel, kemi bashkëpunuar për së afërmi dhe vdekja e tij pos për Gjermaninë është humbje edhe për Kosovën. Në këto çaste të rënda ndajmë dhembjen me familjen e të ndjerit, Kancelaren Merkel dhe Gjermaninë”, tha ai.
Jan Hecker, ambasadori gjerman në Kinë ka vdekur në moshën 54-vjeçare, vetëm pak javë pas emërimit në këtë pozitë, ka bërë të ditur ambasada gjermane përmes një njoftimi, shkruan CNN.
Rrethanat rreth vdekjes së diplomatit nuk janë bërë të ditura.
Hecker u emërua Ambasadori i 14 -të Gjerman në Kinë në fund të gushtit. Para emërimit të tij, ai shërbeu si Drejtor i Departamentit të Politikës së Jashtme, Sigurisë dhe Zhvillimit dhe kishte qenë këshilltar për politikë të jashtme që nga viti 2017.
Kur pranoi detyrën e re, Hecker kishte thënë se qëllimet e tij për misionin e ri ishin “të kontribuojë në zhvillimin afatgjatë dhe të qëndrueshëm të marrëdhënieve Gjermani-Kinë përmes punës sonë” dhe “të forcojë më tej dialogun dhe partneritetin“.
Hecker kishte vizituar Kosovën në vitin 2019-të, ku ishte pritur nga atëherë kryeministri Ramush Haradinaj.
