Kryetari i Aleancës për Ardhmërinë e Kosovës, Ramush Haradinaj, deklaroi se sanksionet që Shtetet e Bashkuara të Amerikës i vendosi ndaj disa personave për krim të organizuar në veri të Kosovës janë shumë të rëndësishme, pasi ato parandalojnë destabilizimin e Ballkanit.
“Amerika së pari dëshiron t’i bindë të gjithë në rajon se qeverisja e mirë, shteti ligjor, lufta kundër korrupsionit janë vlera dhe secili do të vlerësohet në bazë të këtyre qëllimeve ose angazhimit në këto vlera, por po ashtu askush nuk do të lejohet që të nxjerrë jashtë kontrollit shtetin ligjor, qeverisjen e mirë ose të krijojë pasiguri”.
“Ne kemi parë tentativa të vazhdueshme të krijimit të pasigurisë në Ballkan. Me këtë rast, SHBA-ja po tregohet se është e vendosur pra ta luftojë korrupsionin, krimin nacional e transnacional, por edhe të mos lejojë destabilizimin e rajonit,” tha Haradinaj.
Haradinaj, në Rubikon, foli edhe për takimin me Milan Rodoiçiqin, i cili është në listën e personave, ndaj të cilëve u vunë sanksione.
Haradinaj tha se me të ishte takuar në kontekst të arritjes së një marrëveshjeje për bashkëqeverisje me Listën Serbe dhe se që nga viti 2018 nuk ka pasur kontakt me të.
“Është e vërtetë që jam takuar më Radoiçiqin, është e dokumentuar, e kam takuar në kohën e negociimit për marrëveshje të qeverisjes me Listën Serbe dhe në një kohë të bashkëqeverisjes me Listën Serbe, derisa u vendos taksa, e pastaj taksa na largoi me Listën Serbe, për fat të keq, pasi ne nuk kemi pasur interesim me i prishë marrëdhëniet me Listën Serbe, kuptohet pasuan edhe veprimet e tjera si Trepça dhe kulmoi me ushtrinë dhe na i përkeqësoi mjaftueshëm marrëdhëniet me Listën Serbe dhe me të gjithë, pastaj pasoi edhe një aktakuzë, me sa e di unë për zotin Radoiçiq, kështu i bie që nga 2018 s’kam pasur komunikim me zotin Radoiçiq,” tha Haradinaj.
Haradinaj tutje tha se në kohën kur është takuar me Radoiçiqin nuk i ka pasur informatat që i ka tash.
“Nuk kam pasur informata kush është kush, nuk i kam njohur aq mirë, informatat që i kemi ne sot dallojnë nga ato që i kemi pasur para vrasjes së zotit Ivanoviq, ose para krijimit të qeverisë, se nuk ka qenë kështu, nuk kemi pasur kualifikime ligjore për askënd prej tyre, që i bie se nuk duhet t’i paragjykojmë edhe sot”.
“Edhe sot mund të ndodhë që dikë që e takojmë, jo vetëm serbët dhe shqiptarët që i takojmë unë ose dikush mund të rezultojë, pra nuk paragjykojmë ku përfundon dikush, ne kemi një mision që na e ka dhënë kushtetuta dhe misioni ynë është t’u japim serbëve të Kosovës besimin që t’i besojnë Prishtinës, udhëheqësve të Kosovës dhe të mos i paragjykojnë kosovarët, nëse unë ose UÇK-ja ka luftuar dje sot dëshirojmë t’i integrojmë ata, jo t’u ndodhë atyre ajo që na ka ndodhur neve në kohën e Millosheviqit,” tha Haradinaj. /Gazeta Enigma/.
