Imami nga Gjilani, Naser Halimi ka njoftuar se është sulmuar nga qentë endacakë në orët e hershme të mëngjesit, derisa po shkonte në xhami për ta falur namazin e sabahut.
Si pasojë e sulmit, Halimi ka pësuar lëndime trupore dhe ka përjetuar trauma.
Pas këtij rasti, ai u ka bërë thirrje organeve kompetente që të ndërmarrin masa konkrete për trajtimin e problemit të qenve endacakë.
Sipas Halimit, qentë endacakë po paraqesin rrezik për jetën dhe sigurinë e qytetarëve, ndaj ka kërkuar që institucionet përgjegjëse të veprojnë për të parandaluar raste të tilla.
Në reagimin e tij publik, Halimi ka përshkruar momentet e vështira të përballjes me qentë, duke theksuar se situata ishte tejet e rrezikshme.
“Sot në mëngjes, ka po shkoja për në xhami për ta falur namazin e sabahut, u sulmova nga qentë endacakë. Si pasojë e sulmit të qenve, unë mora lëndime trupore, përgjakje, shtypje…!Përveç lëndimeve në trup, kam fituar edhe trauma, ngase me të vërtetë ka qenë thuajse një luftë fyt më fyt me qentë endacakë”, ka shkruar Halimi.
