Instituti i Kosovës për Drejtësi(IKD) vendimin e djeshëm të Gjykatës Kushtetuese për të ndjerën Sebahate Morina e ka konsideruar si një fitore kundër dhunës në familje dhe dhunës në baza gjinore, ndërsa kanë kërkuar reflektim nga institucionet e Kosovës, për të cilat thanë se me heshtjen e tyre po tregojnë se sa e kanë prioritet mbrojtjen e grave nga dhuna.
Po ashtu, përfaqësuesit e IKD-së gjatë kësaj konference për medie kërkuan dorëheqjen e kryeprokurorit të Prokurorisë Themelore në Prishtinës, Kujtim Munishit dhe prokurorit të rastit të Sebahate Morinës pas aktvendimit të djeshëm të Gjykatës Kushtetuese i cili konfirmoi shkeljen e së drejtës në jetën e tashmë të ndjerës.
Zëvendësdrejtori i Institutit të Kosovës për Drejtësi, Betim Musliu e ka konsideruar të pafalshme heshtjen e krerëve shtetëror pas shpalljes së aktvendimit nga Kushtetuesja për rastin e Sebahate Morinës.
“Për këtë rast Qendra për Ndihmë Juridike e IKD-së më 13 korrik 2021 në emër të fëmijët të tani të ndjerës Sebahate Morina ka dërguar në Gjykatën Kushtetuese rasti me pretendimin se tani të ndjerës përmes mosveprimit i ishte shkelur e drejta në jetë. Këto pretendime më në fund janë konfirmuar nga Gjykata Kushtetuese…Sipas Gjykatës Kushtetuese i është mohuar e drejta në jetë….Për ne është shumë e çuditshme dhe po ashtu e pafalshme heshtja e presidentes Osmani e kryeministrit Kurti, ministres Haxhiu e sidomos ministrit Sfeçla lidhur me këtë rast pas shpalljes së këtij aktgjykimi nga Gjykata Kushtetuese, heshtja e tyre flet se sa e kanë prioritet gruan, mbrojtjen e saj nga dhuna në familje”, tha ai.
Gëzim Shala po ashtu nga Instituti i Kosovës për Drejtësi tha se mënyra se si është vepruar në rastin e Sebahate Morinsë dëshmon e shpërfaq sistemin prokurorial dhe institucionet tjera si institucione që mbrojnë prokurorët e jo viktimat e dhunës.
Prandaj, për të dëshmuar të kundërtën, Shala bëri thirrje që të japin dorëheqje kryeprokurori i Prokurorisë Themelore në Prishtinë, Kujtim Munishi dhe prokurori i rastit.
E përgjegjës kërkoi të mbahen edhe zyrtarët policor të stacionit të Graçanicës.
“Aktgjykimi i Gjykatës Kushtetuese thotë se Policia e Kosovës stacioni në Graçanicë dhe Prokuroria Themelore në Prishtinë tani të ndjerës ia kanë shkelur të drejtën në jetë që është e drejta më sublime Kushtetuese…pas kësaj Prokuroria Themelore në Prishtinë e udhëhequr me këtë kryeprokuror më nuk ka integritet dhe kredibilitet për të mbrojtur viktimat e dhunës në familje. Për këtë arsye veprimi më i paktë që kërkohet nga ana e kryeprokurorit Munishit dhe prokurorit të rastit është dorëheqja e menjëhershme e tyre për të treguar se në rastin konkret mbajnë përgjegjësi dhe që sistemi vazhdon të jetë i gatshëm për të mbrojtur viktimat e dhunës në familje, nëse kjo nuk ndodh më e pakta që mund të bëjë sistemi prokurorial që të dëshmoj se nuk vepron në mënyrë koorporatiste duke mbrojtur prokurorët e caktuar, por vepron në drejtim të mbrojtjes së viktimave të dhunës në familje…krahas Prokurorisë duhet të mbahen përgjegjës edhe zyrtarët e Policisë në Graçanicë të cilët janë konfirmuar nga Gjykata Kushtetuese se mos veprimin e tyre kanë kontribuar në shkeljen”, u shpreh Shala.
Koordinatorja e Qendrës për Ndihmë Juridike të IKD-së, Arrita Rezniqi tha se kërkesa e tyre në Gjykatën Kushtetuese kishte synim që të vërtetohet konstatimi për mos veprimin e institucioneve përkatëse në rastin e tanimë të ndjerës Morina.
Ajo tha se ndonëse tri ditë pasi rastit kishte publikuar një raport me gjetje që tregojnë dështimin e institucioneve nuk është ndërmarrë asnjë veprim konkret.
“Një vendim i tillë i cili është marr dje nga ana e Gjykatës Kushtetuese që ne e kemi pritur që një kohë të gjatë që të vendoset për këtë rast përkundër ndjeshmërisë dhe dhembshurisë që na përfshinë të gjithë neve që kemi qenë të përfshirë në trajtimin e këtij rasti përbënë një rast të rëndësishëm dhe shënon një fitore të madhe për krejt rastet kundër dhunës në familje dhe dhunës me bazë gjinore”, tha ajo.
Tutje nga Qendra për Ndihmë Juridike e IKD-së u bë e ditur se për të quar drejtësinë në vend do të vazhdojnë me veprime procedurale që kanë të bëjnë me kompensimit e dëmit material dhe do të kërkojnë llogari përmes mekanizimeve institucional.
E dje Gjykata Kushtetuese ka dalë me vendim për të ndjerën Sebahate Morina, e cila ishte vrarë nga bashkëshorti i saj.
Në vendim thuhet se institucionet e Kosovës, respektivisht, Gjykata Themelore në Gjilan, Prokuroria Themelore në Gjilan, Stacioni Policor në Graçanicë dhe Prokuroria Themelore në Prishtinë, kanë dështuar ta mbrojnë jetën e të ndjerës Sebahate Morina.
E ndjera Sebahate Morina, ishte vrarë më 14 mars 2021 nga ish-burri i saj, i cili po ashtu kishte vrarë edhe vetën./KP
