Marina e Italisë gjatë së dielës ka nisur 49 emigrantë që kishte marrë në ujërat ndërkombëtare, për në ambientet e paraburgimit në Shqipëri.
Kështu ka bërë të ditur ministria e Brendshme e Italisë, duke rifilluar një plan për të ndaluar mbërritjet në detin italian.
Qeveria e Giorgia Melonit ka ndërtuar dy qendra pritjeje në Shqipëri, marrëveshja e parë e tillë që përfshin një vend të Bashkimit Evropian që i drejton emigrantët në një vend jo anëtar të BE-së, por ato kanë mbetur bosh që nga nëntori, pasi u përballën me kundërshtimin e gjykatës, raporton Reuters, transmeton Gazeta Enigma.
Ministria ka njoftuar se një anije patrullimi është duke shkuar drejt Shqipërisë me 49 emigrantë në bord, ndërsa 53 të tjerë të cilët u morën gjithashtu dhe që paraqitën pasaportat e tyre për të shmangur zhvendosjen e menjëhershme, ndodhen në Itali në pritje të verifikimit të statusit të tyre.
Transferimi është një përpjekje të re nga qeveria për të zbatuar politikën e saj pasi gjyqtarët në Romë vunë në dyshim vlefshmërinë e tij dhe urdhëruan që dy grupet e para të emigrantëve të ndaluar në Shqipëri të zhvendoseshin në Itali.
Polemika rreth planit, të cilin Meloni e sheh si një gur themeli të synimit të qeverisë së saj për të kufizuar imigracionin, sillet rreth një vendimi të Gjykatës Evropiane të Drejtësisë vitin e kaluar, i cili nuk kishte lidhje me Italinë.
Gjykata ka thënë se asnjë vend i origjinës nuk mund të konsiderohet i sigurt nëse edhe vetëm një pjesë e tij ishte e rrezikshme, duke minuar idenë e Romës për të deportuar në Shqipëri emigrantët nga një listë e përzgjedhur e vendeve “të sigurta” me qëllim riatdhesimin e tyre të shpejtë.
Gjykata Evropiane do të shqyrtojë planin e Italisë në javët e ardhshme dhe të sqarojë nëse është në përputhje me ligjin e BE-së.
