Barcelona nuk arriti më shumë se një barazim pa gola (0-0) në udhëtim te Cadiz në kuadër të javës së gjashtë në La Liga.
Ndeshjet jo të mira nga Barcelona kanë vazhduar, pasi humbjes nga Bayern Munichu dhe barazimit ndaj Granadas, iu shtua edhe një barazim ndaj Cadiz.
Barcelona u përpoq të vuloste autoritetin e tyre në lojë gjatë pjesës së parë dhe nuk arriti ta bindte, ndërsa puna u vështirësua në minutën e 65-të, kur Frenkie de Jong u përjashtua pasi mori kartonin e dytë të verdhë.
Katalunasit me dhjetë lojtarë nuk patën më shumë fat për të gjetur golin dhe ditët e trajnerit Ronald Koeman në krye të ekipit tani mund të numërohen.
“Në këtë vend ju largojnë nga loja për asgjë”, ka thënë fillimisht Koeman, i cili u ndëshkua në fund të ndeshjes.
Ai nuk pranoi të fliste për të ardhmen e tij.
“Ju duhet të analizoni se çfarë ka bërë ekipi, qëndrimin e tyre, përkushtimin e tyre”.
“Unë nuk dua të analizoj situatën time personale. Presidenti ka shkuar në hotel dhe ka thënë lamtumirë”.
“Ne ndoshta kemi më shumë ditë për të folur nëse ai dëshiron të flasë”, përfundoi trajneri i Barcelonës.
