Deputetët e Kosovës në seancën e sotme të Kuvendit mes tjerash kanë kërkuar shkarkimin e ambasadorit të Kosovës në Kroaci, Martin Berishaj.
Deputetja e PDK-së, Blerta Deliu-Kodra, para deputetëve tha se Kosova nuk guxon të rrezikojë partneritetin me një shtet mik si Kroacia.
“Në kohën kur Kosova e ka një mundësi reale për anëtarësim në Këshillin e Evropës, Kosova është përfshirë në një aferë me përmasa shumë të mëdha. Ambasadori Berishaj duhet të shkarkohet Qeveria dhe Presidenca nuk janë as gjykatës as prokurorë. Z Berishaj pas këtij skandali nuk do të jetë në gjendje të ushtrojë detyrën e tij”.
Deputetja opozitare tha se mos shkarkimi i Berishajt paraqet standard të dyfishtë.
“Janë shkarkuar diplomatë vetëm se kanë shprehur qëndrimet e tyre në rrjete sociale. PDK insiston që Berishaj sa më parë të shkarkohet nga detyra e tij”, u shpreh ajo.
Ndërsa, deputeti i LDK-së, Besian Mustafa tha se Berishaj duhet të kthehet në Kosovë dhe të raportojnë tek organet e rendit dhe ligjit.
“Sot ambasadori i Kosovës është epiqendra e një skandali meditik e politik në slloveni. I njëjti ka qenë njeri i afër i Lëvizjes Vetëvendosje. Kush është i fajshëm dhe i pafajshëm duhet të vendosin organet e drejtësisë”, deklaroi Mustafa.
Ndërsa, edhe Time Kadrijaj nga AAK ka kërkuar e shkarkimin e Berishajt nga kjo pozitë.
Ndryshe, sot në Kuvendin e Kosovës deputetët pritet t’a votojnë themelimin e Komisionit Hetimor për Energji.
